(八十六)鬼快相
要講香港經典鬼故事，不得不提1993年11月出現嘅一張「鬼快相」。
話說當時傍晚時份，交通警在屯門青山公路上影快相，當回去把相片沖曬出來之後，大家都嚇了一跳，他們竟發現其中一張快相中，右下角非常清楚地出現了一個全身透著橙色光芒的「老婆婆」身影，正正就站在一架超速車輛旁，面上目無表情的直盯著鏡頭，輪廓清晰，眼神非常詭異。 .
照片之後被刊登在各大報章頭版上，由於相片是由政府部門提供，更令大家議論紛紛。更有報導指，事發前的五天，剛好在現場同一地點中，發生過一宗奪命車禍，一名老婦遭車輾斃，司機不顧而去，而翻查得知，死者樣貌竟與照片中的「老婆婆」身影極為相似，疑為同一人。
零零後的你，可能從未聽過呢件事，但只要你嘗試過直視呢張照片，肯定會讓你頭皮發麻，久久不能忘懷。
呢張相，亦納入為本人嘅童年陰影系列之一。
嗰陣有一排，夜晚熄燈上床訓教，唔知係咪太驚，一合埋眼，會唔覺意閃過呢張相入面嗰隻橙黃色光出嚟，即時會諗起相入面個老婆婆，佢望住鏡頭，好似想一步一步行出嚟咁…
喂呀！
好喇， 呢張相，真係唔好望住太耐，望得太耐真係好難會唔記得, 唔記得, 唔記得。
到大個咗，搭車經過屯門公路都總係覺得寒寒地，可能歷年來，呢度出現嘅交通事故實在太多喇。 .
另一單聽到我毛管戙嘅經歷係嚟自一個夜班的士司機朋友，佢話有次空車經過屯門公路近汀九附近嗰陣，好衰唔衰，畀佢見到前面馬路旁邊有幾個小朋友晌度跳豆袋，一個跟一個咁跳。夜媽媽，半夜三更，有幾個小朋友晌馬路到玩，佢都知領嘢喇，但都無辦法，唯有故作鎮定快手駛離現場。
佢乜都唔理，淨係望住前面，諗住儘快從旁駛過，據佢講，當途經嗰班小朋友玩個位置嘅時候，佢係實實在在咁眼尾稍到佢地，係好真實好似普通細路咁，甚至乎，佢隱約聽到幾下笑聲傳入佢車度。
過咗都無兩分鐘，晌佢以為鬆返一口氣嘅時候，佢突然聽到後座傳嚟一下小朋友玩嘅笑聲，佢本能反應即刻望向倒後鏡，佢見到…
有個細路企咗晌佢架的士嘅後座！
佢當堂嚇到扭軚，一下就自炒咗埋旁邊石壆。
萬幸之下，嗰次交通意外佢無乜大礙，但係自此，佢都緊記：如果揸車嗰陣晌屯門公路見到咩野不可思議離奇事，盡可能都落車去做乘客，因為你永遠唔知，你見到嘅「嘢」會唔會又晌前面等緊你。
同埋，一定要裝車cam，佢話，起碼睇下影唔影到，多樣證據，唔係領咗嘢都無人知，以為佢痴q咗線。
我聽到呢度，又諗返起，青山公路上面嘅老婆婆，點解佢會再次晌嗰段公路上出現？點解要被大家影到？佢係一種訊息？
我總係覺得，「佢地」嘅出現，一定有佢嘅原因，是否有一d說話，想告訴現世人知道？
自今，都只係一個謎。
然而，廿六年後嘅今日，我會想，如果「鬼快相」再度出現，我們還會有機會目睹嗎？還是，這等照片會被標籤上「迷信」、「影響群眾情緒」而應該被消失，不宜刊出在報紙頭版上？把之隱藏好了。
當流傳民間的鬼故事愈來愈少，到底這是一種進步，還是一種倒退？
把拍到的靈異錄像公開，由大眾自行分辨真偽，對鬼本身，都不失為一份尊重，一種責任。
碌到呢幅相嘅您，如果認為不能只有您見到嘅話...tag frd子分散恐懼啦～
#真人真事 #離奇 #鬼故 #鬼 #靈異 #不可思議 #離奇家遮 #恐怖 #文字 #口耳相傳的香港鬼故事 #香港 #鬼相
《口耳相傳的香港鬼故事 3 - 冥冥．註定》
經已出版，各大小書局有售。
ig : donotsayhello
Search